無麩無蛋奶蘋果椰汁蒸米糕

上次做了香蕉味pancake,今次試用蘋果蓉再做蒸糕給小彥彥。

蒸糕的好處可放入雪櫃保存多一天，要吃前再蒸熱，質感不會改變！

蘋果切粒用水煮半小時至變軟，然後壓力蓉
加入PANCAKE粉（已一早調配好）
加入椰奶後，粉漿會呈蛋糕漿的狀態，想蒸糕不實，軟一點的話，便要加多一點水，要弄到似熔了的雪糕一樣稀。然後放入模具蒸15分鐘

Miele燉花膠湯

花膠湯煲過好多次，煲中煲燉又試過！

買左蒸爐，當然要試一試燉湯的滋味～

家中有許多花膠，為花花煲開光，早一晚就用花花煲浸發定～

平時用淮山杞子瘦肉及花膠燉湯，這一個次沒有淮山，改用㘣肉，顏色深一點，湯又甜一點～用Miele燉湯超方便！只需把所需材料加適量的水入煲內（我是用冷水），原煲用100度燉3小時！期間完全不用怕乾水滾瀉，可輕鬆地午睡一會～嘻嘻！

Blogger們所說的輕鬆煮真的沒錯！花花煲八成滿的份量足夠三人飲！

想多飲一點下次可以用22 Round~

自家制豬肉鬆 by 26 marmite

煲湯常剩下豬肉掉去會很浪費，如果有麵包機便可以輕鬆做個豬肉鬆！不過我家的麵包機已送人了！再加上沒有果醬功能都做不到！

今日下午有一點時間，就來試下自家炒炒吧！

沒想到自家炒都可以做到！雖然有點累，但覺得很好玩！而且自家制可以做自己喜愛的味道！無添加！沒有味精，沒有防腐劑！吃得放心又健康！

先把豬肉用手搣成幼絲（別少看這個工序，小小一舊廿多元的豬𦟌肉搣了我一個小時！）

媽咪鍋加入熱水把整個鍋加熱，然後倒掉水，用廚房紙抺乾鍋

用小火白鑊放下肉絲炒乾，這個需要約十多分鐘，炒肉鬆的方法不同炒餸般炒，要把鑊鏟平放左右搖鬆肉絲，有點似炒茶，我多用一支木勺來幫手，容易炒得多！只要筆起肉絲然後打散便可。

炒至乾身後便可加入調味！我做一個簡單的，只加頭抽及天然糖，邊試邊調味。

味道合心意後便再炒乾肉絲，這個時候約需要15分鐘，炒至乾身便成。

沒想到自家制的肉鬆原來這般容易做！很有成功感呢！

家鄉芋頭糕

年年過年都一定要吃芋頭糕！係我既至愛！
今年在媽媽的指導下第一次做！

材料：
芋頭       半斤
沾米粉   2/3 碗（我用LC Rice Bowl黎度)
粟粉       1/3碗
水           1 1/2碗
臘腸       1條
蝦米       三至四湯匙

芋頭切去邊緣白色的部分（因為白色部分冇咁粉）
切厚片，留兩片切成粒

厚片芋頭蒸十五分鐘，厚片芋頭蒸完馬上用义壓成芋茸
粒粒芋頭蒸十分鐘備用

臘腸蒸軟用食物處理器打成幼粒

蝦米浸軟又用食物處理器打成幼粒

開粉漿：先落粉後慢慢加入水然後加入調味（糖一茶匙，菇粉半茶匙）

先將蝦米臘腸爆香

加入芋頭芋炒均後再加入粉漿，此時要快手攪均至杰身

倒入膠盤（膠盤不用搽油都可以輕易脫模）上面灑上蝦米及臘腸碎做裝飾

蒸45分鐘後曬上蔥花便可

煲中煲 ﹣ 椰汁燉燕窩

媽媽從家裡拎左D燕窩黎，我教佢用煲中煲燉，做法非常簡單
浸完D燕窩用冰糖用小火燉一小時就攪掂

煲中煲 18 Risotto in 26 Marmite

食前再加椰汁攪均

花花缽仔糕

網上群組最近都被缽仔糕洗版！
好想整！參考呢個 Blog ，其實做法好簡單！

材料：
紅豆 40g

A
粘米粉 80g
鷹粟粉 22g
水 100ml

B
水 200ml
黃糖 70g

將A 混合好攪至軟滑狀
加入煮滾的B，最後加入少許紅豆至每一個花花碟內

今次用新買既美亞26cm蒸架！咁日後用Marmite 蒸野就唔洗咁難拎同可以用大少少既碟！仲唔需要加個蒸架O係煲內怕整花又怕有印啦！

用中小火蒸20分鐘，可用牙簽測試下D糕熟未！然後放涼！

放涼後就可以用竹簽义起！

掛住食，冇影到义起後既樣！

雞蛋花雕蒸蟹

呢味餸我非常愛！因為我愛花蟹！不過因為敏感唔可以多食，再加上懷孕又唔敢食！
到宜家七個半月，好似乜都唔怕咁～就整一次食少少啦！其餘既由家人分享！

第一次做！上網跟住網友教既方法做！
效果非常得！我一路食一路不禁讚嘆！哈哈！

呢個看似好勁既餸原來做法都好簡單！

材料：
蛋4隻 （約150ml)
雞湯 同蛋一樣份量
花雕 2湯匙
花蟹 一隻

做法：

蟹洗淨劏好斬件

小魚第一次劏蟹！買返黎見隻蟹仲未死！唔攪佢住！直到佢冇哂活動能力先攪佢～安全D！

斯文劏蟹法係用廚房剪！

先剪開兩個蟹鉗，揭開三角位塊野，然後開蓋，剪掉肺葉

然後要用菜刀喇！但唔洗勁劈啦！只係落刀後HOLD住蟹然後拍落針板度就好易被劈開！

咁就可以成功將蟹先生解體！

本來想放落花花碟蒸，但太迫了！唯有用IKEA碟！

先蒸蟹4分鐘，然後倒入蛋漿再蒸7分鐘！

最後加上蔥花就攪掂！

咁既方法，蟹同旦都好滑！蒸完既蟹汁加埋蛋汁咁一齊蒸，蛋有蟹味！

正！

小插曲：原來要用26Marmite蒸野都要搵合適既碟！花花雖然夠位放！

但唔夠位蒸蛋加蟹！

唯有從冷官中搵來IKEA既深碟！好彩放到落Marmite度！睇黎IKEA碟

都不可輕易放棄佢呢！

紫心煲開光﹣花膠炆雞

紫心煲開光！
趁媽媽生日正日，煮餐飯過佢吃下！花膠炆雞，係一個勁簡單既炆餸，但我仍然係做得比較濃味！下次要落少D豉油！多D水！

紫心出場！先爆香薑蔥

加入切好醃好既雞肉略炒至轉色

加入湯汁（湯汁有花雕，豉油，湯，蠔油，水）

用小火炆45分鐘再熄火焗半個鐘就攪掂！

煲中煲燉湯 ﹣ 淮山杞子花膠燉豬展

燉湯我燉來燉去都係燉花膠湯！
今次用18 Risotto 同 26 Marmite 黎玩煲中煲！唔洗拆的！ 18 Risotto vs 16 Round， 18 Risotto 除左矮身D之外，容量真係多少少～
宜係多好少少～不過就因為咁，我就用18 Risotto 黎燉湯啦！
燉出黎都有三至四碗 LC Rice Bowl 咁多！足夠我同相公飲一餐！
第時坐月如果燉一人份既野，我都會叫媽咪用咁既方法做～
（燉一人份燉品我最怕燉雞！因為媽咪話要食埋D湯渣，但成隻雞點食呀？半隻都唔得啦！所以我會叫媽咪燉雞脾架！咁咪唔會浪費左成隻雞囉！）

燉湯最簡單就係放哂D材料落去唔洗理佢，用最少火燉兩個鐘熄火焗到飲既時候！我下晝兩點開始煲，夜晚七點飲仲係暖架～

最好就係落左螺片成個湯一D調味都唔洗落！簡直係乾手淨腳！

平時發定D花膠放冰格，想煲時只需買舊豬展就掂～（淮山杞子同螺片長期雪櫃都有架！）

所以我同相公都超愛呢個簡單既燉湯～非常清甜呀～！

極速清淡晚餐：冷豆腐，蟹柳蒸水蛋，炒菜心

今晚又想清清地，想為Pale Rose 花花碟開光，於是決定蒸水蛋！
不過今次又失敗左！蒸10分鐘老得滯！相公話要煮多D練習下！

不過今晚既亮點係冷豆腐，一味不用多氣力既餸～
O係吉之島買一PACK可即食既豆腐，加少許蟹柳絲，然後加麻醬（唔係芝麻沙律醬）最後及最重要就係加肉鬆！
肉鬆同豆腐簡直係好朋友～！！一定要一齊食呀～

話係極速，真係好快攪掂既一餐，因為蒸蛋只用左10多分鐘，用媽咪鍋炒菜心又係幾分鐘，

個冷豆腐又簡單～
所以不消半小時就煮好～係Working煮婦既好選擇丫！

雪菜雞絲炆米

出外成日都愛叫炆米！自從上次整左個花膠炆米之後，好多整一次雪菜肉絲炆米

超市有售現成既雪菜，連切粒都慳返！（有時我會試味，睇下會唔會好咸，如果好咸我會加少少糖）

材料：
雞絲（我用左兩塊雞扒切絲去皮）
雪菜一包
濃湯寶 一粒
米粉兩個
水 兩杯

先爆雞絲至轉色, 加入雪菜炒香

加入已用水浸軟左既米粉炒均

再加入滾水及濃湯寶，等米粉比D湯煮下～吸收D湯！其實水要落幾多都睇情況同埋試味，最好慢慢加D，因為太多水會變成湯米

當米粉吸收左D湯汁後試味，唔夠味可以加返豉油或者鹽

蔥油塩麴雞扒撈丁

常吃蘭芳園既蔥油雞扒撈丁，非常愛蔥油，愛既程度可以蔥油撈飯都可以！

自家制蔥油可以用橄欖油同海鹽，仲可以多蔥少油少薑～所以我好BUY自家制！

塩麴（米花）其實係一種調味料，用黎醃肉一流！
之前睇為食台Charmaine教用過，網上煮婦們又瘋傳過！
難得有一日去CC Super 仲有最後一樽，即買！
呢隻係可以即用！

做法太簡單！
只需用一茶匙左右既塩麴搽落雞扒既兩面，唔洗醃好耐，只需幾分鐘就得！
跟住放入焗爐用200度至金黃（約10﹣15分鐘左右）
上碟前切開一片片～加少許用牛油炒過既椰菜！如果怕太少汁（其實單係蔥油已夠味），可以加少少淡豉油

無水蒸腐乳雞亦

呢款雞亦可謂冇得頂！
網友們都勁讚，我又試下做！
參考鬼嫁BLOG，我減左豆辦醬，家中冇紹酒轉左用味琳
效果都好正呀～～～～
相公本來話好飽只食到一隻，最後都食左3隻！

材料：
雞亦 10隻
蒜蓉  1茶匙（我愛蒜所以加多少少）
糖 1茶匙
腐乳 3磚
味琳 1湯匙
醃30分鐘


我懶，冇學鬼嫁咁用保鮮袋醃，我真接用18Risotto 醃完蒸就得～

無水蒸密碼係446，即係4分鐘中火，4分鐘細火，再熄火焗6分鐘

用 18 Risotto 無水蒸真係冇得頂～我一定會再Encore 呢味餸架！

清淡晚餐：蒸水蛋＋椰菜炆釀豆卜

今晚想清清地（其實係自己懶惰唔想諗整乜）
O係超市見到有現成釀好既魚肉豆卜，好耐冇食過，買左再諗點整！
想起家中仲有半個椰菜，將佢兩個加埋一齊算～

咁O岩今日未食過蛋（每日一蛋嘛）不如試下蒸水蛋！

蒸水蛋之前上LC Cooking Class 教過！但當時Miss 做完黎既又唔跟Recipe 又老左！
所以我就試下跟 Recipe 做！

材料：
蛋 3 隻 (今日用中碼蛋，用左4隻）
雞湯 300ml

用LC 14 stoneware 放入 Oval25度玩煲中煲

煲滾Oval內既水然後加入蛋＋雞湯既混合物！燉5分鐘再焗5分鐘！

不過可惜當我焗超過5分鐘時打開蓋覺得蛋仲係好水狀，所以我再燉多10分鐘！
雖然好滑，但好“筆”起黎好似有D水咁～下次我都係用返花花碟蒸算！

豆上用20Skillet平底煎Pan 煎至魚肉金黃，然後用LC Marmite 鍋炒椰菜，後加豆上，湯汁只係隨意地加左魚露，糖，味琳
炒均加蓋焗一陣就攪掂！相公大讚豆卜入哂D汁味～正！

花膠海參炆米

尋晚食剩半煲花膠炆海參，本來想再加D花膠再炆一下食多次，不過發定左D花膠用完，懶得發過一批
心想不如試下用D剩餸做個炆米啦！

初初想用媽咪黎炒下～
但當我翻熱煲花膠時，又諗諗，咁多湯，不如放哂D米粉落去咪得囉！炒都唔洗炒！
咁就變成左炆米，初時以為D湯汁好似好多咁～

但蓋蓋焗一陣，D米粉已經吸哂D汁，變成炆米了！

米粉吸哂D汁，好好味～呢個方法果真係好煮意呢～