星期五, 9月 28, 2012

日式咖喱雞飯

今日閒在家煲劇, 忘了要預備晚飯~!!
匆忙地unfreeze雞扒 (我常常話在家足不出戶都唔會餓死就係咁)
雪櫃裡有用剩既小甘筍同紅椒, 仲有半個洋蔥!加埋之前買落既日式咖喱磚, 就做成今晚既晚餐~!!

近排睇LC FANS既BLOG太多~ 提醒左我家中既18cm Staub都可以用黎極速煲飯~



與米同樣份量既水慢火煮十多分鐘, 就食得~ 快過電飯煲好多喎~

同時間O係另一邊爐煮咖喱

今次用O係吉豬島買既咖喱磚~

先將醃好既雞用炒至轉色然後上碟
再同鑊炒軟洋蔥後再加入小甘筍同紅椒


炒軟蔬菜後加入雞肉回鑊

然後加入雞湯同咖哩磚攪勻


蓋上蓋煮幾分鐘至聞到香味


簡單既日式咖哩就攪掂~

用23cm Plate 上碟, 襯~~~

星期日, 9月 23, 2012

第一次手搓麵包

麵包機待修中, 又想整包, 就試下手搓!!初初都戰戰兢兢, 怕搓唔出會發酵既麵糰出黎~!!!
不過, 做完個鬆餅, 搓左幾下麵糰, 又覺得可以試下做包~!!
於是就O係呢個悠閒既下午做包包~
當然, 第一次搓, 即係上網睇左VIDEO, 都唔會搓得好功夫~
不過我都要搓到見到薄膜既時候才停手, 大概搓左15分鐘左右吧~



但麵糰搓極都唔夠睇VIDEO既靚~都照試下發酵
結果, 個麵糰唔係發得好好~ 冇預期中發到一倍咁大~!!
但用篤手指測試, 又好似得得地~!! 於是又proceed第二次搓麵糰同發酵~!! 

第二次待發酵時, 見到麵糰好似又唔係發得預期中大, 於是放下走去煮晚飯~
到晚飯後再看看時, 原來已經發到好高~!! 跟住可以好開心咁放咁焗爐~!!

掃上蛋汁同芝麻~ 入爐170度焗40分鐘~
因為覺得佢發酵得唔太好, 應該唔會好成功, 但見佢最後又發大左~
於是O係焗既過程中成日去望下佢焗成點~
結果焗左15分鐘, D包包已經好順利咁成長中~


包包焗出黎都有脹爆既感覺~


切出黎包包都好軟, 都好好味~!!不過D 質感有待改善呀~
一次過整左包包同SCONE, 最好就係同家人朋友分享啦~!!

三文魚意大利飯

悠閒既星期六, 除左做包同鬆餅, 都要煮返個正經晚飯~
老公話想食Risotto, 於是去買左包意大利米同細細支既白酒~
兩樣加埋都唔洗$40蚊~



諗左好耐都唔知個飯配乜餸好~ 因為食緊中藥, 海鮮同菌類都要少吃!!
O係超市見到三文魚扒, 就用黎配飯啦~

第一次自己買意大利米黎做Risotto, 又跟"玩味廚房"本書做~
原來好簡單!

今次買左呢隻上湯, 又有機又冇味精, 下次要試埋低鈉果隻先~


材料:
50ml白酒, 洋蔥, 160g意大利米, 800ml 上湯

1. 炒香洋蔥粒


2. 加入意大利米與洋蔥炒均

3. 加入白酒炒2分鐘至白酒香味被吸收
4. 改中小火, 加入2大湯匙上湯, 炒拌至上湯被米吸收然後再加湯

跟住就keep住加湯同攪拌D飯~大約煮到20分鐘到, 要讓米中心留有一點硬度
然後用鹽同胡椒調味, 可以按喜好加入一點香草~

用新既LC藍色碟上碟~!!


再加埋用上湯煮既菠菜~用哂D LC黎上菜, 食都食得開心D~
好期待明日友人拎兩件戰利品黎~



最後的戰利品

第一日開倉幫朋友買左焗盤, 第三日友人放假再去~為我買左兩件~
真係好後悔冇叫佢買粉紅碗呀~不過老公話仲有心儀既野未買, 下次就可以有籍口再去~
又要等半年~


Satin Pink Crock成為家中第一位粉紅成員~



今次開倉為廚房這一角充滿色彩~


今次開倉真係去得太少...期待半年後既開倉再戰

星期六, 9月 22, 2012

第一次做Scone (附食譜)

之前買左本書, 裡面有好多用 le creuset 既食譜, 可惜好多唔係海鮮就係牛, 唔係咁O岩食~
不過裡面都有教做一D包點, 例如英式鬆餅~!!

細個去KFC, 好LIKE佢個鬆餅, 但宜家既鬆餅已經變左~!!
今次跟住本書做~ 一個個STEP都有哂相~!! 做法又簡單~!!
變成一個悠閒既星期六下午茶~!!

材料:
無鹽牛油95克
中筋或低筋麵粉290克
泡打粉1.5茶匙
砂糖40克
白醋或檸檬汁1小匙
牛奶165ml
蛋1個(做蛋汁用)

做法:
1. 牛油切小粒, 與篩過麵粉,泡打粉及糖混合成粉狀
2. 加入牛奶, 做成麵糰
3. 將麵糰分成兩份, 上下重疊, 重覆3次
4. 用圓形餅模吸出圓形餅型, 然後掃上蛋汁
5. 入預先已加熱210度的焗爐焗20-25分鐘

入爐前~



210度焗20-25分鐘~出爐喇~!!!
個樣都幾得咁喎~!!



用LC 23cm Plate 上碟~愛~!!!

星期日, 9月 16, 2012

Family Dinner & 新LC開光大典~

上次O係美食展買左既蝦, 今次整第二around, 同家人分甘同味~!!

今次嫂嫂揀左蒜蓉蒸~!!


下面放著剛買既Cherry Red Trivet, 襯到絕~!!

嫂嫂愛吃牛排, 我就有個伴可以一齊食喇~!!!
用上LC既GRILL PAN, 今次我已經掌握到煎牛排既火候喇~! 約7成熟~ 好滿意~!!
用新買既23cm Plate上碟~ 真係好靚呀~我D牛排同隻碟~!!



至於媽媽, 佢唔食牛, 就買左豬排等佢同老公分享~!!
因為我未控制到煎豬排既火候, 唔想over cook, 用Grill Pan煎至金黃色再入焗爐焗十分鐘
藍色既LC Plate,配上豬排同配菜, 都係好靚~~~愛呀~~~



又蝦同排, 又要整意粉比姪女食, 最好就係整雜菜啦~
茄汁會比較開胃, 放上甘筍番茄同菠蘿, 開胃之選~!!



第二個菜又係白汁芝士焗西蘭花, 本想用奶同芝士算了,
點知味道都係唔夠~結果都加左一粒白汁磚~



黎個大合照, 意粉多得滯, 用完26cm Rectangular Dish都唔夠, 要加個18cm新買既 Cassis Rectangular Dish, 18cm 剛夠哥哥一人份量~


大合照忘了將兩個Lavender Oval Bowl 入鏡~

香草蜜糖烤雞

上次用LC Oval Dish 焗雞, 中間要反轉隻雞再焗, 有D煩~

今次用左焗爐既旋轉烤雞功能~
焗雞時完會不用理~只係我間唔中望下隻雞個樣~
效果非常滿意~!!



烤雞開始!


因為搽左蜜糖, 烤出黎既顏色好靚~


雖然今次唔係用Oval Dish焗, 但用佢黎上碟都不錯~!!
新既紅色Oval Dish, 真係望落都醒神D~

單食雞有D單調, 家中只有燈籠椒, 就用黎清炒啦~!!
用26 CM BUFFET黎炒, 仲可以將D燈籠椒同甘筍仔焗稔D~!!


呢張相既主角, 好明顯係新歡23CM PLATE啦


同埋Lavender Oval Bowl 一齊黎個大合照先~!!

星期六, 9月 15, 2012

LC 開倉日

又到一年二度LC開倉日!!
今次開倉DAY1 在星期六, 可以一早去潮聖!!
見過BLOGGER都在最早一批進場, 可以買到煲架Trivet~我都要試一試~!!
不過今次得自己一人去, 好緊張~!!
幸好遇上又一人既隊友, 大家目標都係個Trivet~ 一於兩人合作~!!
今次大事真係好多人, 多人過3月尖沙咀果次~!!
我7:45AM到左, 都係排60-70到~ 幾驚唔可以首批入去~!!

一入去到, 已經見到D人係咁掃D碗, 我根本插唔入去~
話係掃, D人真係拎個大袋倒入去咁滯, 攪到D STAFF都話買還買唔好整爛~!!

我同隊友一路搵煲架, 好彩, 兩個人去真係唔同D, 佢個子高D, 我地係咁掃~ 應該掃左8-9個~
有紅橙藍三色, 我自己每個色要一個, 剛好FOR兩個LC一個STAUB用~!!

另外最搶手既, 就係碟, 今次遇上大碟~ 我真後悔只拎左一色一隻,
後來想再拎時已被掃空.....
唯有希望友人再去時幫我留意下吧~




短短一陣間, 我同隊友就咁既戰績, 之後我地一人看守一人再行~



呢推就係我既戰利品~!!不過最上面個磨東東冇要到, 因為實在冇乜用~



呢個東東真係我既好發現, 雖然一向對呢D細細件冇乜興趣, 但發現左一個14CM既,
SIZE係GOOD FOR做燉盅用~!! 只係230, 即買, 仲推介比隊友同佢既友人, 隊友即拎多4-5個~!!



大合照影漏左個spatula, O係cashier度見到, 得返白色, 照殺~!!


想買既都買到, 如果可以買多D碟仲好~!! 大滿足~!!

星期五, 9月 14, 2012

白汁吞拿魚長通粉

上次整左個蟹柳版, 今次用粟米粒同吞拿魚再做~
又用白汁磚


焗白汁芝士什菜飯

之前朋友黎食飯仲有D物資淨, 例如甘筍同西芹, 仲有D芝士,
再加埋之前O係吉豬島買既白汁磚~又黎白汁焗~!!

今次整焗飯~
因為好怕甘筍陣味, 所以我成日都會將佢煮到好稔~
用LC鍋做, 可以令D甘筍快D稔~
今次用埋淨低既粟米粒, 爭係做什菜都好colorful~


o係吉豬島買既白汁磚, 比之前果隻大盒D, 有八粒磚, 做兩次焗飯就剛好~

星期日, 9月 09, 2012

第二包:超軟牛油方包

諗住第二包整提子包, 但MENU的唔work, 似鬆餅多D但叫raisin bread!!
做左兩次都做唔到, 放棄menu的recipe, 決定做左個晨早麵包~!! 方包~!!
今次唔用menu既, 網上找來OL的超軟方包~

因為係晨早包, 牛油唔可以後落, 照去~!!
結果非常滿意~!! 好鬆軟~!!



出爐既樣方方正正~~

切開黎, 內裡鬆軟~
一朝早起身能夠食到咁美味又新鮮既包包做早餐, 真係好幸褔呀~~~