小魚幸褔生活: 7月 2013

星期二, 7月 30, 2013

我的快樂孕記 17 ﹣Shopping for BB

尋日相公放假，話想入一轉元朗屯門（因為屯門開左一田有BB野減價）
結果O係一田空手而回！
唯有去元朗一轉睇下朋友介紹既BB衫！
不負我所望！D衫真係又平又抵呀！

牌子有Carters/Disney/H&M
價錢只係 $50/$35/$25

仲有呢一套我同相公都好鍾意～用黎比仔仔第時新年或擺滿月／百日宴著～So Cute!!!

只係＄180！！！

星期一, 7月 29, 2013

日式豬軟骨

Blogger 11R Share 左日式豬軟骨既做法！原來非常簡單！

材料：

豬軟骨一磅（CC Super 有售）

味醂 60ml

萬字醬油 80ml

清酒1湯匙（我冇清酒，搵支花雕頂住先！）

水 500ml

糖 2湯匙＋（我覺得唔夠甜，再加左1湯匙）

做法：

先將解凍豬軟骨洗淨然後出水

將所有調味料混合後然後落豬軟骨煮滾，滾後加蓋煲1.5-2hrs

煮完放入雪櫃，第二晚拎出黎加熱多半小時左右，D豬軟骨好入味！

相公話呢味餸係咁耐以來最好味既！

同場加映孕媽媽餸：腐乳炒椰菜同鹽焗三文魚頭

星期日, 7月 28, 2013

燉湯我燉來燉去都係燉花膠湯！
今次用18 Risotto 同 26 Marmite 黎玩煲中煲！唔洗拆的！ 18 Risotto vs 16 Round， 18 Risotto 除左矮身D之外，容量真係多少少～
宜係多好少少～不過就因為咁，我就用18 Risotto 黎燉湯啦！
燉出黎都有三至四碗 LC Rice Bowl 咁多！足夠我同相公飲一餐！
第時坐月如果燉一人份既野，我都會叫媽咪用咁既方法做～
（燉一人份燉品我最怕燉雞！因為媽咪話要食埋D湯渣，但成隻雞點食呀？半隻都唔得啦！所以我會叫媽咪燉雞脾架！咁咪唔會浪費左成隻雞囉！）

燉湯最簡單就係放哂D材料落去唔洗理佢，用最少火燉兩個鐘熄火焗到飲既時候！我下晝兩點開始煲，夜晚七點飲仲係暖架～

最好就係落左螺片成個湯一D調味都唔洗落！簡直係乾手淨腳！

平時發定D花膠放冰格，想煲時只需買舊豬展就掂～（淮山杞子同螺片長期雪櫃都有架！）

所以我同相公都超愛呢個簡單既燉湯～非常清甜呀～！

星期六, 7月 27, 2013

My Little LC Tower

今日同友人傾開我有幾多LC，身痕拎左D 鐵煲出黎影下～

16cm Round - Antique Rose
18cm Risotto - Cherry Red
20cm Round - Chiffon Pink
22cm Marmite - Kiwi
22cm Round - Dune
26cm Buffet - Cherry Red
26cm Marmite - Orange
25cm Oval - Costal Blue
20cm Skillet - Cherry Red
Square Grill Pan - Cobalt Blue

都係八個煲兩個Pan 姐～當中除左22 Round，其他都係常用系列～

相比好多LC Fans，我真係走實用路線～唔花巧（都冇花花煲）唔花心（又冇心心煲）＜﹣其實密謀緊買返個心心煲～

至於Stoneware，我真係冇力拎佢地出黎一一影相喇～不過比起之前影過一次都差好多～
第日搬屋我諗我都會考慮下同佢地影返張合照～

星期四, 7月 25, 2013

我的快樂孕記 16 ﹣Shopping for BB again!

Gap 近日大減價，友人紛紛到場掃BB衫，我都捉左媽咪去！
買夠五件再有六折！好多BB衫都係二十蚊件左右，真係好抵！

不過我發現BB衫既款唔多，可能比人掃左不少～
況且佢D款色都係過頭LUP，（BB衫最好係扣紐）所以都只係買左少少咋！

再去護協買左D濕碎野

其中要推介呢個奶粉格！
一搬都係買三層高果D！款色老套呀～（最大原因係我冇得買HELLOKITTY！）
比我發現呢個AVENT的！

三格係隔離，唔會好似一般三層咁高身，而且個間格可以抽走第時唔放奶粉可以當零食盒用，而且仲係BPA Free!
可以放心用呀！

星期二, 7月 23, 2013

書展的收穫

一年一度既書展，連大著肚既我都要去！
因為相公話年年都去，早D去冇咁迫喎！
再加上今次有朋友帶入場，佢更加唔放過呢個機會啦！

每年書展食譜書機乎係必掃既！
不過今年買得好理智！只係托網友買左偶像鬼嫁既作品！
自己呢？就主力買媽媽書囉！
首先就係坐月湯水啦！我真怕媽媽煲來煲去都係果幾款湯水！所以買左D坐月食譜書比佢睇～
係呀！係比佢睇呀！因為佢煮比我食嘛～哈哈！

另外日本媽媽既書我想買好耐，好想兒子第時都係一個負責任既小孩！“自理”係好重要呀！咁我呢個懶媽媽可以唔洗好似D怪獸家長咁乜都幫佢做嘛！

我的低能系列，係不可不睇既一個系列吧！每次我睇都笑到出哂聲！仲要比相公睇埋一份～
去完書展，我足足累左成日！累既程度係第二日訓到中午都仲覺得好想訓～代價真大！

相公仲預告：BB 展，一定要去！因為好多野睇（冇話買呀）最多平日去～
睇黎我呢個愛去乜展物展既相公，係唔會放過我呢個大肚媽媽～

玩命遊戲﹣ 種香草 UPDATE：BB長大了

今次好用心咁去種香草！
好小心咁一稞稞咁去轉盤，等佢地有多D空間生長丫！
宜家Basil BB 們又長高左，葉又開始變大了！
但距離出面買到既Size 好似仲有好遠路呀！！！希望可以成功啦！

好快又要換盤咯！

星期四, 7月 18, 2013

我為花狂

由二月份開始買左第一隻橙花花碟，到開倉入左Power Blue and Orange Blossom就開始發花癲！
成日追尋Pale Rose 花花邊度有，朋友到台灣都叫佢地幫手搵下，冇既連黃色都唔放過！
直到最近網友做團購O係Korea訂左Powder Pink 花花～我真係十萬個開心！但尚欠Pale Rose!!

好彩網友話台灣又返貨，仲有特價，厚著面皮又請朋友幫我代敗！
於是，我們就幾經辛苦儲齊大花碟各色！

集齊所有大花碟我非常開心～簡直可以訓覺都可以笑醒！真係要多謝各方好友既幫忙呢！

相公見我買左咁多花花碟，佢問我仲會唔會再買，我話如果大花碟再有新色就好難講喇～嘻嘻

再加埋平時左買右買既花花碟們～宜家先發覺我尚欠細橙花！好快就可以一家團聚～嘻嘻～

極速清淡晚餐：冷豆腐，蟹柳蒸水蛋，炒菜心

今晚又想清清地，想為Pale Rose 花花碟開光，於是決定蒸水蛋！
不過今次又失敗左！蒸10分鐘老得滯！相公話要煮多D練習下！

不過今晚既亮點係冷豆腐，一味不用多氣力既餸～
O係吉之島買一PACK可即食既豆腐，加少許蟹柳絲，然後加麻醬（唔係芝麻沙律醬）最後及最重要就係加肉鬆！
肉鬆同豆腐簡直係好朋友～！！一定要一齊食呀～

話係極速，真係好快攪掂既一餐，因為蒸蛋只用左10多分鐘，用媽咪鍋炒菜心又係幾分鐘，

個冷豆腐又簡單～
所以不消半小時就煮好～係Working煮婦既好選擇丫！

我的快樂孕記 15 ﹣買BB衫

不經不覺小魚B o係我肚內已六個多月，宜家正忙著LIST OUT有乜要買！
衫呢，見到可愛既就想買！

不自覺地一買就買左6件，可以O係唔同時間著，買BB衫除左要留意質地，仲要留意季節同SIZE！
因為小魚B 係十月B，出世時係秋冬時期，所以NEW BORN衫要買中長袖～

有一日閒逛花園街掃左D衫，其實花園街都有地方賣Carters BB衫架！只要細心搵下就搵到！
仲要係正貨，質地都唔錯添！