我的快樂孕記 14 ﹣產檢（新醫生）

上個月去產檢時醫生話BB細左兩星期！但要我8星期後先覆診！其實宜家我係數要4星期去一次！

所以我決定轉醫生！朋友介紹既黃醫生比較細心，而且仲會轉4D比你睇下BB既樣！價錢仲平過我睇開果個！

於是前兩日就去左睇新醫生！

結果同朋友所講既一樣，醫生非常細心，同我地照BB時仲同我地講笑，仲專登放大BB條脷比我地睇下佢有冇玩脷！（結果小魚B冇玩啦）

但醫生好細心咁講BB已經調左頭（咁快？）但距離出世仲有一段時間，所以會變呢！

醫生仲講左BB宜家係O係我個肚度點樣訓，PAT PAT大概O係邊度，咁我就知道有時BB郁係邊度郁緊～

最得意係BB比左個WELCOME CLICK醫生，醫生O係照超聲波時比BB踢左好勁一下～醫生都叫左一聲！

最開心，就係BB SIZE追返喇！仲叫我唔洗特別增加食量（其實我一直都冇！因為我想食多D都好快飽，一直以黎我都係小食多餐咋）

宜家BB 26週有多，有兩磅喇！應該算係中大碼B，估唔到我個肚細過人，BB 竟然係中大碼！

希望佢乖乖地增長啦～

BB下巴尖尖，似我多D！我放心好多呀！我怕似哂相公一個呀～嘻嘻

雪菜雞絲炆米

出外成日都愛叫炆米！自從上次整左個花膠炆米之後，好多整一次雪菜肉絲炆米

超市有售現成既雪菜，連切粒都慳返！（有時我會試味，睇下會唔會好咸，如果好咸我會加少少糖）

材料：
雞絲（我用左兩塊雞扒切絲去皮）
雪菜一包
濃湯寶 一粒
米粉兩個
水 兩杯

先爆雞絲至轉色, 加入雪菜炒香

加入已用水浸軟左既米粉炒均

再加入滾水及濃湯寶，等米粉比D湯煮下～吸收D湯！其實水要落幾多都睇情況同埋試味，最好慢慢加D，因為太多水會變成湯米

當米粉吸收左D湯汁後試味，唔夠味可以加返豉油或者鹽

蔥油塩麴雞扒撈丁

常吃蘭芳園既蔥油雞扒撈丁，非常愛蔥油，愛既程度可以蔥油撈飯都可以！

自家制蔥油可以用橄欖油同海鹽，仲可以多蔥少油少薑～所以我好BUY自家制！

塩麴（米花）其實係一種調味料，用黎醃肉一流！
之前睇為食台Charmaine教用過，網上煮婦們又瘋傳過！
難得有一日去CC Super 仲有最後一樽，即買！
呢隻係可以即用！

做法太簡單！
只需用一茶匙左右既塩麴搽落雞扒既兩面，唔洗醃好耐，只需幾分鐘就得！
跟住放入焗爐用200度至金黃（約10﹣15分鐘左右）
上碟前切開一片片～加少許用牛油炒過既椰菜！如果怕太少汁（其實單係蔥油已夠味），可以加少少淡豉油

無水蒸腐乳雞亦

呢款雞亦可謂冇得頂！
網友們都勁讚，我又試下做！
參考鬼嫁BLOG，我減左豆辦醬，家中冇紹酒轉左用味琳
效果都好正呀～～～～
相公本來話好飽只食到一隻，最後都食左3隻！

材料：
雞亦 10隻
蒜蓉  1茶匙（我愛蒜所以加多少少）
糖 1茶匙
腐乳 3磚
味琳 1湯匙
醃30分鐘


我懶，冇學鬼嫁咁用保鮮袋醃，我真接用18Risotto 醃完蒸就得～

無水蒸密碼係446，即係4分鐘中火，4分鐘細火，再熄火焗6分鐘

用 18 Risotto 無水蒸真係冇得頂～我一定會再Encore 呢味餸架！

慢煮牛面肉

一個月前去左上Cooking Class，學左整慢煮牛面肉，即場睇老師示範，驚覺牛面肉係咁腍咁好味！！
於是就訂左1kg牛面肉，因為做法其實一D都唔難，同紅酒燴牛肋差唔多！

牛面肉 1kg

蒜 5瓣

甘筍粒 50g

洋蔥粒 50g （家中得半個洋蔥，搵左兩粒乾蔥幫補下）

西芹粒 50g （聞說懷孕婦女唔好食西芹，所以冇落呀）

茄膏 30g

紅酒 150ml

黑椒粒 10g （今次冇落）

香葉  一塊 （我用左兩塊）
（我加左罐番茄蓉，個汁會濃D）

煎香牛面肉（新歡26黑裡Marmite真係好勁鑊氣，煎牛面時好香，而且因為傳熱均勻，所以放D牛面在側邊煎都夠熱煎香，呢D係我既美亞易潔PAN做唔到架！）

將牛面肉撈起

先炒香蒜粒，洋蔥及乾蔥

加入茄膏將雜菜炒香

加埋罐茄肉及香葉，然後放牛面肉，加水到蓋到材料半吋左右（22Marmite已經好滿，我緊緊蓋過食材咋）
然後入焗爐用180度焗3個半小時

撈起D牛面肉，夾果陣已經感覺到佢好腍喇！

淨低個汁好香呀！

lend完後個Look好杰咁～再加返D牛面肉落去煮一陣，只需加少少海鹽調味就攪掂！

連不太愛牛既相公都讚好呀～佢話D牛面肉唔洗用力咬～好鬼正～
除左配飯，配意粉都好好味！