回顧2012

2012， 對我來說可謂坐過山車一樣的一年！

心情，信仰，金錢，健康，工作。。。都一樣！

不過我相信，上天要我地經歴，不論開心或不開心事，都是要使用我們去祝福其他人！

感恩在我經歴種種時，有深愛我的人及好友在旁！當然還有天父！

2012要感恩的事真的很多～祂知道便可以了！
因為是衪讓我滿足，讓我失意時很快回復過來！
失意時，當然會很沮喪，但懂得看看世界，相比之下，自己所遇到的，其實很少事。
要活在當下，珍惜眼前擁有的一切！

2012 BYE BYE～

2012除夕晚餐

寒冷既除夕夜，梗係在家迎接2013～

早一日已經O係吉豬島買定餸！

有蒜香蜜糖焗雞亦，駝鳥扒，煎鴨肝，唔想做焗菜或沙律，干脆炒個菜心算了！

駝鳥扒真係同牛扒很相似，煎出黎既顏色都係！用左忌廉香草汁，個汁唔太成功，不過都入得口既～

鴨肝煎得好靚～！下次要配多士！或者整返個汁先！

本來係想整蒜鹽雞亦，用蒜鹽醃好雞亦入焗爐焗，不過顏色白雪雪唔鍾意，O係上面掃上蜜糖再焗，顏色好快就好靚！

參考偽主婦既簡單版燉奶，真係好易做到好滑既燉奶！相公好滿意，第二日仲話想ENCORE！

只需一隻旦白，150ml牛奶，一湯匙糖，打勻後隔渣，再隔水蒸10﹣12分鐘！
真係又快又簡單又美味既甜品！決定下次朋友來晚飯都要做呢個！

真係好滑，下次要用北海道3.6 試下！

怕凍的貓兒們

天氣轉冷，貓兒們都紛紛搵地方取暖！

聖誕交換禮物換到電暖cushion，肥貓米高竟然同我爭住黎用！！

米高：個 cushion 係我既！

米高：其實媽媽你有所不知，我只係想坐暖個 cushion 比你用咋！

懶洋洋唔願出黎！

呢個小朋友最捧呢個DIY屋仔場～

冬天既貓仔真係零舍可愛

蜜糖提子包

又係提子包，又要寫？

因為想歌頌一下由黃糖改成蜜糖既美味！

用左蜜糖，麵包出爐都充滿蜜糖既香味～！

食譜係來自OL的！不過我部機係最少做1.5磅，所以材料加量！

材料：
高筋麵粉 250/375g
牛油 10/15g
鹽  4/6g （今次唔記得落鹽！）
蜜糖 50/75g （我用左二記買既入爐蜜糖）
提子 50/75g (我今次用左90g)
蛋 1/1.5隻
牛奶 140/210cc
酵母 3g/4.5g (錯手落左6g! 幸好效果還好！)
相信我這部話可以做到兩磅包包既SIZE既麵包機，6g酵母應該係佢既極限喇！

呢個食譜搓出黎既麵糰比較濕同黏！唔知點解個包包無論用幾多材料做呢個食譜個麵糰都會側埋一邊！
我O係佢第二次發酵時將麵糰用匙稍為修整一下佢既形狀，使佢可以平衡返D

切開裡面感覺良好！加量既提子最O岩我！
不過有D提子好似被攪爛了！我下次會再遲D先放提子！

我真係分別唔到有鹽同無鹽有咩分別，只覺今次既包包好軟！好鍾意！

臘腸排骨煲仔飯

用LC做煲仔飯已經很熟手！工展會買左咁多臘腸，做煲仔飯點少得佢～（其實係我很喜愛吃！）

今次試下臘腸排骨！

想去超市買豆豉，結左都係買樽豆豉醬～方便好多～！只係用個醬來醃排骨就可以了！

最近喜愛用LC22CM黎煲二人湯，今日煲左青紅蘿蔔～好甜～！！

用現成豆豉醬好醃出黎D排骨好似好深色咁，可能重手左！

忌廉粟米

忌廉粟米雖然係今晚既配菜，但好味程度，足以令佢成為左主角！

今次跟MAY姐既食譜做！

材料：
粟米粒  300克
甘筍       半條 （手痕加入）
忌廉      120毫升
海鹽      半茶匙
即磨黑椒 半茶匙
牛油      15克
鮮奶       120毫升
麵粉       15克
Parmasen Cheese 1湯匙
百里香及乾Parsley 隨意 （手痕加入）

做法：

用牛油快炒粟米粒同甘筍粒

加入忌廉海鹽、黑椒及香草

鮮奶溝麵粉成糊，加入鍋裡煮至杰身，最後加入芝士

忌廉粟米成為今晚既配菜

主菜係咖喱汁豬扒，上碟時加少許乾Parsley，就冇咁似沙律～

工展會小敗

又到一年一度既工展會！年年都去！每年都有唔同既FOCUS！
去年買左好多星加玻即食麵同埋花膠，今年就樣樣有D！

其實我唔係鍾意去迫，不過鍾意去展覽一次過可以睇哂好多間店！仲有好多時都有特價！
所以年年D美食展呀，書展呀，工展會，都差唔多一定會去！係同相公假期既好去處！

今次好忍手，唔係好抵既或者平時少見先會買！

當中最抵，就係呢SET 孖人牌鉸剪，唔洗6百蚊可以有罐頭刀，剪到骨既鉸剪，nail cutter 同埋小刀！
樣樣都好用！有左呢把剪刀，我可以剪臘鴨同臘腸，唔洗成日驚切／斬到手！
孖人牌刀具好用好多人都知，但價錢都唔平！真係要等有特價先會買！
不過耐用同永久保用，真係貴D都抵！
回家即時掉左D唔利既剪刀同罐頭刀！BYE！

又敗LC ﹣ 中粉紅毒

百佳最近推出左用MONEYBACK積分換LC STONEWARE！
當中只有心心鍋吸引到我！用積分加錢就可以換！
所以嚴格黎講， 今次都唔算係敗，因為都冇出過＄＄（因為用埋信用卡既積分換！）

其實一直都對呢D細細件冇乜好感，覺得佢細細件，唔實用！
但係，成日都見到網友POST出黎，又放沙律又放甜品！實在好吸引！

有CHERRY RED同SATIN PINK揀！SATIN PINK唔係漸變色，相公話CHERRY RED顏色出D，不過我近來中左粉紅毒，相公話與其一紅一粉紅，倒不如一SET SATIN PINK啦！

第一日，就落樓下間百佳睇下，點知冇擺出黎！再問下，又話未有貨！

點知朋友都話O係第二區有開始換喇！

思前想後，難得相公比我敗！

於是今日返OFFICE附近既百佳尋下！

去到見到只得一隻PINK同一隻紅！心諗，照要啦！
不過又想問下人仲有冇新既！話哂都係剛剛開始換嘛！
於是一問，原來有新架！職員入倉拎左兩個SATIN PINK比我～開心死！

成個LUNCH之後都好開心～ HAHA～

今晚煮飯，都要即時開光啦！

網友話，載湯都唔錯～就試下啦！

今晚既煲仔飯即刻成為配角！

Boxing Day 靚湯：花膠淮山紀子湯

好耐冇煲過花膠湯，上次用高速煲黎煲，太大煲，飲左好多日！
今次將份量減半！用LC 22cm 煲，一D都唔走水，又唔會滾瀉！

材料：
花膠一大片
淮山1両
杞子一湯匙
薑兩片
瘦肉

一直都好懶發花膠，成日都係想煲之前一日浸定！不過朋友教，可以一次過浸定一D，其餘既可以放冰格慢慢用！

呢個份量，可以兩個人飲兩日！只需煲個多小時，已經好入味！

簡單聖誕餐

大魚大肉左幾日，今晚同相公都想清清地，於是黎個 Vegetarian Christmas Night!

黎個番茄Risotto！加白汁焗西蘭花！

用新鮮番茄加上湯煮成番茄湯，加D茄膏番茄味更濃！

收乾汁之後來加上 Parmesan Cheese, 真係香好多！最後加上乾既Parsley 為個Risotto 生色不少！

簡單既聖誕餐就完成！
只要同心愛既人一齊渡過，大唔大餐都冇乜所謂啦！

聖誕曲奇：薑餅人

曲奇係我小時候拿手既作品，不過已經兩年冇整過！

今年見朋友們做薑餅人做得咁開心，我又湊下熱鬧吧！

食譜係參考偽主婦的！佢既BLOG寫得好詳細，睇佢既食譜就最清楚！

不過我懶，我冇買黑蜜糖，只用二記買既入爐蜜糖！

材料一大堆!!!

麵粉 3 1／4杯
黃糖 1／2杯
蜜糖 1／4杯
baking soda 3/4 teaspoon
丁香 半茶匙
薑粉 1湯匙
肉桂 1湯匙
鹽 半茶匙
蛋一隻
牛油170g

粉紅色既朱古力筆唔好用！放棄左！好彩仲有支白色既ICING！

一個個小小既薑餅人等住入焗爐

剛出爐既薑餅人，第一次做，我覺得似薑味曲奇多D！

畫左好幾個醜餅人先開始掌握到點畫，本想將佢地畫邊，不過手抽筋！決定黎個簡單版好了！

聖誕樹比較大塊，亦都比較好畫，所以畫埋個邊，又靚D！下次要買埋D粒粒裝飾就再靚D！！

最後將薑餅入袋！送比朋友們！Merry Christmas!!